आर्थिक गुन्हे शाखेतील सहायक पोलिस निरीक्षक २८ लाखांची लाच घेताना रंगेहात अटक

पुणे वृत्तसेवा, दि. ०३ : पुणे शहरात भ्रष्टाचाराविरोधात मोठी कारवाई उघडकीस आली असून आर्थिक गुन्हे शाखेत कार्यरत असलेल्या सहायक पोलिस निरीक्षक वैशाली मुरलीधर तोटेवार (वय ४९) यांना तब्बल २८ लाख रुपयांची लाच स्वीकारताना लाचलुचपत प्रतिबंधक विभाग (एसीबी) पथकाने रंगेहात अटक केली आहे. या घटनेमुळे पुणे पोलिस दलात मोठी खळबळ उडाली आहे. मिळालेल्या माहितीनुसार, एका प्रकरणात अनुकूल अहवाल देण्यासाठी तोटेवार यांनी तक्रारदाराकडून सुमारे ३० लाख रुपयांची लाच मागितली होती. तक्रारदाराने याबाबत एसीबीकडे तक्रार नोंदवली. एसीबीने प्राथमिक पडताळणी केल्यानंतर तक्रारीत तथ्य आढळल्याने सापळा रचण्याचा निर्णय घेतला.

यानुसार शनिवारी (दि. २) बंडगार्डन रोड परिसरातील एका पंचतारांकित हॉटेलसमोर लाच व्यवहार निश्चित करण्यात आला. ठरलेल्या वेळेनुसार तक्रारदाराकडून २८ लाख रुपयांची रक्कम स्वीकारताना एसीबीच्या पथकाने सापळा राबवत वैशाली तोटेवार यांना रंगेहात पकडले. कारवाईदरम्यान घटनास्थळी मोठी हालचाल निर्माण झाली होती.

या प्रकरणात २) संभाजी चव्हाण या व्यक्तीचाही सहभाग उघडकीस आला असून त्याला अटक करण्यात आली आहे. तो लाच व्यवहारात मध्यस्थ म्हणून कार्यरत असल्याची प्राथमिक माहिती तपासात समोर आली आहे. त्यामुळे या प्रकरणाचा व्याप्ती वाढण्याची शक्यता व्यक्त केली जात आहे.

विशेष म्हणजे, तोटेवार यांची नुकतीच पदोन्नती होऊन त्यांची बदली मुंबई रेल्वे पोलिस दलात झाली होती. त्या पुणे पोलिस दलातून कार्यमुक्त झाल्यानंतरही त्यांनी एवढी मोठी लाच स्वीकारल्याने या प्रकरणाची गंभीरता अधिक वाढली आहे. त्यांच्या या कृत्यामुळे पोलिस दलाच्या प्रतिमेला मोठा धक्का बसला आहे.

कारवाईनंतर एसीबी पथकाने संबंधित अधिकाऱ्यांच्या कार्यालयासह निवासस्थानी झडती मोहीम हाती घेतली असून, आणखी आर्थिक व्यवहार, कागदपत्रे आणि संभाव्य पुरावे शोधण्याचे काम सुरू आहे. या व्यवहारामागे इतर कोणतेही मोठे जाळे कार्यरत आहे का, याचाही तपास केला जात आहे.

दरम्यान, या प्रकरणी भ्रष्टाचार प्रतिबंधक कायद्यांतर्गत गुन्हा दाखल करण्यात आला असून अटकेतील दोन्ही आरोपींना न्यायालयात हजर करण्यात येणार आहे. वरिष्ठ पोलिस अधिकाऱ्यांनीही या घटनेची गंभीर दखल घेतली असून विभागीय चौकशीचे संकेत मिळत आहेत.

या घटनेमुळे पुन्हा एकदा पोलिस दलातील पारदर्शकता आणि जबाबदारीच्या प्रश्नावर चर्चा सुरू झाली असून, भ्रष्टाचाराविरोधात कठोर कारवाईची गरज अधोरेखित झाली आहे.